DAKO ang pagpasalamat sa Micro, Small and Medium Enterprises kon MSME’s sa suporta sa administrasyon ni Mayor Rolando ‘Klarex’ Uy pinaagi sa Oro-Trade and Investment Promotions Center (ORO-TIPC), ug Department of Trade and Industry (DTI-10) alang sa umaabot International Food Exhibition (IFEX) karong Mayo 10-12, 2024 didto sa kaulohan.
Nasayran gikan ni Oro-TIPC Head John W. Asuncion nga adunay unom ka mga MSME’s ang mosalmot ug gisuportahan sa dakbayan sa maong expo aron mas maila pa dili lamang dinhi sa nasud apan lakip na sa ubang nasud ang mga homegrown nga produkto sa dakbayan.
Matud ni Melanie Legara, Trade Promotions Officer sa DTI-10, kini ang pinakadako nga International Food Exhibit sa Metro Manila nga gipahigayon matag tuig, ug dako kining kahigayonan sa mga MSME’s nga mapakita ang ilang mga produkto didto sa kaulohan ug mga bisitang langyaw atol sa maong exhibition.
Ang unom ka mga MSME’s nga mopasundayag sa ilang mga produkto mao ang Padla’s Homemade, Shiga, Seabeth Food Processing, Bestfriend Goodies, SLERS, ug Bite Me Up. (GB Photo by CIO)
Unom ka MSMEs sa Cagayan de Oro mopasundayag sa ilang mga produkto atol sa International Food Expo
