Gikalipay pag ayo sa mga taga Barangay Patag ilabina sa Zone 7 ang gipatuman nga proyekto ni 1st District Cong. Lordan Suan nga mao ang access road o pathways alang sa mga residente nga sa kaniadto nag antos sa dili kombenyente nga agi-anan padulong sulod sa maong residential area haduol sa Kampo Evangelista.
Matud ni 1st District Assistant Director Bert Amplayo, ang maong proyekto mi balor sa kinatibuk-an og 5 ka milyonka pesos diin gika butyag nga pasiuna lamang kini sa daghanan pang ibubo nga mga proyekto ni Suan sa Barangay Patag.
Sa maong okasyon, namahayag ang mga opisyales sa barangay sama ni Kag. Engr. Paolo Daan diin sila dakong mapasalamaton sa kongresista sanglit wala man niini kalimti ang ilang barangay. Namahayag usab si Suan nga duol gayud sa iyang kasing-kasing ang Barangay Patag ilabina kay siya man ang gi pili sa mayorya sa katawhan niini sa mi labay nga piliay.
