UNA sa tanan, mapasalamaton ko nga naka-duso na gyud ko sa akong Certificate of Candidacy o COC pagka-mayor karong adlawa.
Mao ni ang akong mga pangutana sa mga pinalangga natong Kagay-anon: Malipayon ba mo sa kahimtang sa atong siyudad karon? Mas hayahay na ba ang inyong kinabuhi? Hayag ba ang kaugmaon sa inyong mga anak?
Nia ko para mobarog alang sa mga Kagay-anon nga uhaw sa Kabag-ohan.
Sa mga nangita og bag-ong solusyon sa mga problema nga dugay na natong giatubang. Sa gusto mo-sulay og bag-o nga klase nga politiko, usa ka bag-o nga mayor.
Nia ko para magkigbisog uban sa mga Kagay-anon nga padayong nagdamgo alang sa usa ka Bag-ong Cagayan kung asa tanan dunay saktong trabaho, libre ang college para sa tanan, limpyo ug malinawanon, protektado ang kinaiyahan, ug walay pabor-pabor pag-abot sa serbisyo sa gobierno apil ang 100% libre nga pagpaospital.
Kining dugay na nga problema sa traffic, kakulangon sa panubig, baha ug ang basura nga dili gakatarong og kolekta, sayon ra sulbaron kung unahon nato ang solusyon, dili ang komisyon.
Akong ipaabot ang akong pagtimbaya sa tanang mga kandidato, lakip na sa akong mga kaatbang sa umaabot nga eleksyon.
Hinaot nga atong ampingan ang demokrasya nga gibayran sa dugo sa atong mga bayani.
God bless the Philippines, God bless Cagayan, God bless us all
