DUGANG nga duha ka mga SUPER HEALTH CENTERS ang naka takda nga paga tukorun karong tuig 2025 sa distrito uno ubos sa programa sa Department of Health Region 10 inabagan sa buhatan ni 1st District Cong. Lordan Suan, kini ang na sayran atol sa gi pahigayong DOH Consultative Meeting kagahapong adlawa, Enero 16, 2024 nga gi tambungan sa mga representante sa mga congressional offices ug mga barangay kapitanes sa parehong distrito uno ug dos ning syudad.
Butyag ni 1st District Assistant Director Bert Amplayo, kinsa mi representar ni Suan sa maong panagpulong nga gi dumalaan ni DOH Regional Director, Dr. Sulpicio Henry M. Legaspi, Jr., ang nasangpit nga duha ka mga SUPER HEALTH CENTERS gi gahinan nag budget ug ipahimotang sa mga barangay sa Pagatpat ug Baikingon, butang nga dakong gika lipay sa mga kapitan nga sila si Gogoy Babaran ug Jao Gumapac.
Dugang pa ni Amplayo nga pasi-una palamang kini nga pagatukorong estraktura alang sa maayong panglawas sanglit iduso gayud ni Kongresista Suan sa umalabot pang higayon ang pag dugang sa susama nga gambalay ug katuyoan ilabina sa mga hinterland barangays aron masiguro nga adunay daling kaduolan ang katawhan sa panahon sa emerhencya o bisan sa ginagmay nga balatian nga nag kinahanglan sa dinalian, haum ug tukmang pag tagad nga dina mag kinahanglan ang pasyente nga mo kanaug sa sentrong bahin sa syudad. REP. LORDAN SUAN PR/JAO GUMAPAC FB PHOTO
