GI TAGAAN sa award ug recognition si 1st District Cong. Lordan Suan gikan sa Department of Education kon DepEd Division of Cagayan de Oro gumikan sa iyang kontribusyon sa pag palambo sa mga programa ug inisyatiba sa mahinongdanong sektor sa edukasyon, dinhi sa dakbayan.
Gi dawat ang maong nasangpit nga award sa representante ni Suan nga mao si 1st District Assistant Director Bert Amplayo, kinsa, usa usab sa mga speakers atol sa “Stake Holders Convergence and Awarding Ceremony” kagahapon, adlawang Merkules, diha sa usa ka resort and convention center sa may Barangay Gusa.
Si Amplayo nagkanayon nga dakong mapasalamton si Suan sa natagamtaman niini nga rekognasyon, apan labaw sa tanan, siya mi duyog sa tinguha sa DepEd sa pag sabwag sa edukasyon nga labing maka tabang sa pag palambo sa nasud sa Pilipinas.
Dugang pa ni Amplayo, komitado si Suan nga mag pabiling kaabag sa DepEd sa dako niini nga tahas pinaagi sa pag suporta ug pagtabang-panday sa mga balaudnon kansang katuyoan mao nga mapalig-un ug mapalambo pag-ayo ang sektor sa edukasyon sa atong nasud.
