NAKUHA ni Cagayan de Oro 1st District Cong. Lordan Suan ang chairmanship sa committee on public information alang sa 20th Congress dipalang dugay, sa nag padayon nga pag plastar sa mga komitiba kon kinsa ang mangulo ug mga mamahimong myembro niini.
Sigon ni 1st District Assistant Director Bert Amplayo, ang maong kalambuan nag padayag lamang sa dakong pag salig sa mga magbabalaud nganha sa kapasidad ni Atty. Lordan Suan nga mangulo sa nasangpit nga komitiba human siya pilia.
Butyag pa ni Amplayo nga sa maong committee on public information, sakop niini ang tanang butang nga adunay kalabutan sa mga pampublikong impormasyon, tanang matang sa mass communication nga gina gamit sa katuyoan nga mi langkob sa print and broadcast media, movie and television, video, advertising, cable television ug internet content ingon man ang responsibilidad sa mga personalidad ug entities nga lakip sa maong industriya.
Kasamtangan pa karong gina pang apud-apud sa mga myembro sa Kamara ang mga membership ug chairmanship sa mga komitiba diin ang kongresista mamahimong ka-parte niini nga matud ni Amplayo, iya rang ikabutyag puhon ang mga dugang kalambuan nga gikalambigitan ni Cong. Lordan Suan.
