DUL-AN 400 ka benepisyaryo sa Ayuda para sa Kapos ang kita Program kon AKAP ang dugang sa ihap nga nakadawat sa hinabang-pinansiyal kagahapon, Nobyembre 11, Lunes sa gipahigayon nga payout sa DSWD kaabag ang buhatan ni Cagayan de Oro 1st District Cong. Lordan Suan sa Brgy. Iponan.
Si Bert Amplayo, ang tigpamaba sa Office of Cong. Lordan Suan, kinsa nag-representar sa Kongresista, nagkanayon nga hilabihan nga kalipay ug pasalamat ang iyang nadawat gikan sa mga benepisyaryo, kinsa nagkinahanglan sa maong ayuda, uban ang pagpasalamat sa gobyernong Marcos, Jr. nga nagtukod niini nga programa alang sa ubos kaayo ang kinitaan.
Apan, matud pa ni Amplayo, mas mapasalamaton si Cong. Suan nga natubag uyamot ang ilang pagpanginahanglan alang sa pag-asdang sa mga pagsulay dala sa kalisod sa panahon karon ug sa ilang panginabuhian nga bisan sa ginagmay makatabang nga makatuntong og pagkaon sa ilang tagsa-tagsa ka lamesa.
Tungod niini, nanganti si Cong. Suan nga samtang siya pa ang anaa sa pangatungdanan, walay mapihig sa mga ayuda gikan sa pang-gamhanang Marcos, Jr., kinsa sayon alang kaniya ang pagtuktok sa kasing-kasing niini pag-abot sa mga pobre.
