STATEMENT OF CAGAYAN DE ORO CITY MAYOR ROLANDO UY:
“Isip kabahin sa atong Kuyog ta sa Serbisyo sa Baryo (KSB), gipahigayon nato ang Kadiwa nga Merkado sa Baryo, aron mapaduol ang presko ug lokal nga produkto gikan sa atong mga mag-uuma ug mananagat direkta ngadto sa katawhan sa komunidad. Pinaagi niini nga inisyatiba, mas sayon ug mas barato nga mapalit sa atong mga residente ang nagkalain-laing abot sa uma ug produkto sa dagat, samtang naghatag usab kini og dugang panginabuhian sa atong mga mag-uuma ug mananagat.
Gawas sa atong senemanang KSB, adunay usab mga nakaskedyul nga Kadiwa nga Merkado sa Baryo nga gi organize pinaagi sa atong Agricultural Productivity Operations Office sa pag panguna ni Engr. Bernie Daba ngadto sa nagkalain-laing subdivision ug mga komunidad dinhi sa atong dakbayan aron mas daghan pang Kagay-anon ang mapahimuslan niini.
Una na usab kitang naghatag og sakyanan alang sa pagkuha ug paghatod sa produkto sa atong mga mag-uuma gikan sa ilang mga barangay paingon sa mga lugar nga adunay nakaskedyul nga merkado, aron mas mapadali ug mapasayon ang ilang pagbaligya.
Padayon kitang magtinabangay sa pagpalig-on sa lokal nga agrikultura ug pagseguro nga ang kaayohan ug preskong pagkaon maabot sa matag panimalay sa atong dakbayan.”
