SUGDAN na sa mosunod nga mga semana ang redevelopment sa Divisoria partikular ang El Pueblo A Sus Heroes ug JR Borja Park/Kiosko Kagawasan human kini gisubhan sa pagpangulo ni Mayor Rolando `Klarex’ Uy ug Bise Mayor Jocelyn Bebot’ Rodriguez, Biyernes ,Nobyembre 8, 2024.
Sa iyang mensahe gipasabot ni Mayor Klarex nga nalangan ang pagtrabaho sa maong proyekto tungod sa pagkonsiderar sa mga masahista ilabina ang mga persons with disabilities (PWDs) diin gipangitaan sila og bag-ong puwesto nga maplastaran aron dili sila mawad-an og panginabuhian.
Samtang gipadayag usab ni Patrick Gabutina, focal person sa Project Lunhaw nga ang pagpatuman sa proyekto namugna gumikan sa gugma sa kinaiyahan ug sa katawhan basi sa panglantaw ni Mayor Klarex. Kini nga kalambuan ang gipasigarbo ni Bise Mayor Rodriguez ilabina nga lain na usab kini nga milestone sa Divisoria uban ang pagdayeg ug pagpasalamat kang Mayor Klarex sa pagpatuman sa maong proyekto.
Alayon niini, lauman usab nga adunay pagsirado sa pipila ka mga dalan sa Divisoria area sa dili madugay. Lakip sa mitambong sa groundbreaking ceremony sila si City Councilors Maria Lourdes Gaane, Roger Abaday, Yan Lam Lim, Bernie Esparcia, ug James Judith ingon man mga department managers sa city hall, ug mga bisita. (ALR/CIO/Photos by Roel Felicitas & Rod Constantino/CIO)
