GIBUTYAG ni Former Board Member Buboy Sabal nga pila ka mga empleyado sa Kapitolyo Probinsyal ang nangandam na og legal nga aksyon batok Misamis Oriental Governor Juliette Uy.
Kini gumikan sa giingong illegal ug daw politically motivated reassignments batok kanila. Dugang niini nga dili makatarunganon alang sa mga empleyado nga girelokar sila sa lagyo kaayo nga mga lugar nga dako kaayo og kasupakan sa civil service rules ug kulang sa legal nga basihan. Ang pagbalhin kanila naghatag og kalisod kanila pinansyal ug personal nga adjustment.
Iyang gipasabot nga kini lakang sa mga empleyado human gibutyag ni Governor Uy sa uwahing interbyu niini nga ibalik na ang pipila ka mga na re-assign sa ilang orihinal nga buhatan kon diin kini nga pamahayag direktang nagkontradiktar sa naekperyensya sa mga trabahante nga gipang-assign sa mga lagyo ug bukid nga lugar. Ang pagbalhin kanila nagresulta sa taas nga biyahe, dugang expenses ug kalisod hilabina dunay mga skilled nga trabahante nga dili haom ilang unang trabaho sa gire-assign kanila.
Gipasabot usab ni Sabal nga nakadugang sa kaisog sa empleyado nga mosang at og reklamo mao ang pag resign sa Kanhi Provincial Administrator nga maoy nagpirma sa controversial reassignment orders nga wala pay gikinahanglan nga approval gikan sa Sangguniang Panlalawigan nga maoy gibasihang nga dunay illegality sa lihok sa gobernador.
Ngani ang designation sa Provincial Administrator giingong wala giduso sa Gobernador ngadto sa Sangguniang Panlalawigan alang sa iyang concurrence maoy rason nga ang lihok sa gobernador matawag nga inbalido ug walay authority.
Dugang niini nga tumong sa pagduso og kaso mao ang paghatag og hustisya sa apektadong mga empleyado batok giingong sa pag-abusar sa pangatungdanan nga daw wala naglantaw sa welfare sa empleyado apan ang gitouhang gilantaw ang pagpamulitika.
