By MARIDEL SALAPANG
City Information Office
GIPAHIGAYON sa lokal nga kagamhanan nga gipangulohan ni City Mayor Rolando ‘Klarex’ Uy ang usa ka briefing session alang sa State of Local Governance Report adlaw’ng Martes, Hulyo 22.
Ang maong kalihokan gimugna sa City Department of Interior and Local Government (DILG) nga gipangulohan ni Ms. Elaine Josephine B. Depaur, DM, CESE, aron lantawon ug subayon ang performance ug ka-epektibo sa Local Government Unit (LGU) sa Cagayan de Oro.
Atol sa session, gipresentar sa City Planning and Development Office ang draft summary sa SLGR nga naglangkob sa mga nahimong kalampusan ug mga butang nga angay pa nga palig-onon sa syudad.
Mitambong sa kalihokan sila Vice Mayor Jocelyn ‘Bebot’ Rodriguez, 21st city councilors, ug mga department heads aron makig-uban sa assessment sa performance sa LGU ug palig-onon ang pagtinabangay ug kooperasyon alang sa mas maayong pang gobyerno.
Kini nga kalihukan usa ka plataporma alang sa mga bag-ong napiling opisyal sa dakbayan, ilabi na ang mga first-termers, aron masiguro ang hapsay nga transition ug pagpalig-on sa ilang abilidad sa pagpangalagad.
Lakip sa briefing ang presentasyon sa mga hagit, kakulangon, ug rekomendasyon gikan sa lain-laing sektor sama sa economic, environment, infrastructure, institutional, peace and governance ug social governance.
Si city administrator Atty. Roy Hilario Raagas, nga nirepresentar ni Mayor Klarex, nagkanayon nga importante ang tanang departamento magtinabangay ug mag-uban aron masiguro nga nakasentro sila sa strategic goals sa dakbayan ubos sa RISE Agenda (Regional Leadership, Institutional Development and Participatory Governance, Safety Security and Human Development, & Economic Recovery).
Kini nga inisyatibo nagpakita sa lig-on nga paningkamot aron mapaayo ang pagdumala ug mas mapalambo ang serbisyo alang sa katawhan sa dakbayan. (Inset by IREN FUENTES)
