KLAREX NGA EDUKASYON GILUSAD
GILUSAD sa syudad sa pagpangulo ni Mayor Klarex Uy ang Klarex nga Edukasyon adlaw’ng Miyrekules, Disyembre 17, sa Apo Malaki Integrated School Bugsuk Extension, Barangay F.S. Catanico, ning siyudad.
Lakip sa mga serbisyo nga gitanyag sa maong programa ang libreng check-up, tambal, tuli, ibot sa ngipon nga gidumala sa City Health Office, JR Borja General Hospital ug City Health Insurance Office.
Libreng champorado usab ang gitanyag sa City Social Welfare and Development Department (CSWD). Anaa usab early Christmas gift nga gipang-apud apod sa CEDO nga gilangkoban sa bugas ug school supplies alang sa 80 ka mga estudyante nga nagtungha sa maong eskwelahan gikan sa Kindergarten ug Grade 9, baka ug mga manok gikan sa City Veterinary Office; libreng seedlings, mga water tank ug fertilizer gikan sa Agricultural Productivity Operations Office.
Anaa usab libreng training kalabot sa Basic First Aid ug libreng first aid kits nga gitanyag ang City Disaster Risk Reduction Management Department.
Samtang, libreng bugas, construction materials ug tumbler ang personal nga gipang apod-apod sa pamilya ni Mayor Klarex Uy.
Sa laing bahin, aduna usab gi-instalar nga mga solar panels sa maong lugar nga gi-sponsor mismo sa Aboitiz Foundation, Inc.
Gilaumang planong tukoran sa siyudad og tulo ka makeshift classrooms kon temporaryong classroom ang maong area aron madugangan ang mga classroom sa mga bata ilabina ang mga estudyante niini gikan sa Kindergarten hangtud Grade 9.
Ang Klarex nga Edukasyon, proyekto sa City Education and Development Office nga susama sa usa ka mini KSB special ubos sa administrasyon ni Mayor Klarex Uy. Tinguha niini nga mapaduol ang mga serbisyo sa gobyerno ngadto sa katawhan ilabina ngadto sa last mile school kon mga tunghaan nga anaa sa kabukiran. (NLB/photos by Jhoanne Abejo/CIO and MKU PR Team)
