HILABIHAN nga kasadya ug kalipay nga gitagbo sa mga opisyales ug residente sa Brgy. Bonbon si Cagayan de Oro 1st District Cong. Atty. Lordan Suan sa dihang midangat kini sa lugar kagahapon sa hapon, Hulyo 30, 2024, arun sa pag turnover sa balor P10 milyones nga proyektong multi-purpose covered court alang sa katawhan sa nasangpit nga lugar.
Asoy pa ni 1st District Assistant Director Bert Amplayo, di gyud magmahay ang katawhan sa Brgy. Bonbon tungod sa proyekto nga taudtaud na usab nila gipangandoy nga nahataga’g katumanan ni Cong. Suan.
Gawas nga aduna kini built-in basketball court, rubberized pa gayud ang salug niini.
Atol gihapon sa maong okasyon, dugang asoy ni Amplayo, nag apod-apod si Cong. Suan og fishing gears kauban ang tinugyanan sa Bureau of Fisheries and Aquatic Resources kon BFAR ngadtu sa ubay-ubay ka mga organisasyon sa mga mangingisda sa maong coastal barangay, butang nga dakong gika pasalamat sa mga opisyales ug katawhan sa barangay Bonbon.
