KAPIN 300 ka mga benepisyaryo ang gipailawom na usab sa validation ug orientation ubos sa programang TUPAD sa Department of Labor and Employment kon DOLE Region 10, asa kini gi pahigayon sa Macanhan, Barangay Carmen subay sa inisyatiba sa buhatan ni 1st District Cong. Lordan Suan sa tuyo nga kahatagan sa bisan temporaryong panginabuhian ang katawhan.
Masayran nga ang maong kalihokan gi tambungan sa representante ni Suan nga mao si 1st District Assistant Director Bert Amplayo, kinsa namahayag nga ang maong programa sa nasudnong kagamhanan dakong suportado sa kongresista sanglit maka hatag man kinig kaarangan sa pinansyal nga kondisyon sa iyang mga constituents nga padayong nakig bisog sa inadlaw-adlaw nga mga panginahanglanon ug mga balayronon sa matag tagsa nila ka mga pamilya.
Butyag pa ni Amplayo nga bisan karong adlawa, aduna pa gihapoy ipahigayon nga susamang kalihokan alang sa laing ginatos ka mga benepisyaro nga nag gikan sa nagkadaiyang barangay sa distrito uno, lakip niini ang panginabuhian o livelihood program ni Cong. Suan nga madawatan sa ubay-ubay ka mga residente.
Pahinumdumon ni Amplayo nga sa mi labay nga semana, dul-an libo ka mga taga distrito uno ang naka benepisyo sa SLP kon Sustainable Livelihood Program sa kagamhanan ubos gihapon sa inisyatiba ni Kongresista Lordan Suan.