HUMAN bag-ohay lang gisugdan pagpatuman ang Republic Act 12077 kon paghatag moratorium sa balayrunon sa mga magtutungha nga nakasinati sa kalamidad ug mga emerhensiya, laing balaudnon na usab ni Cagayan de Oro First District Cong. Lordan Suan nga pabor sa sektor sa turismo ang gipirmahan ni Pres. Ferdinand Marcos, Jr. niadtung Lunes, December 9, 2024.
Sulti ni Bert Amplayo, ang tigpamaba sa Office of Cong. Lordan Suan, ang Republic Act No. 12079 kon an act creating a VAT refund mechanism for non-resident tourists, adunay dakung positibo nga epekto sa industriya sa turismo dinhi sa Pilipinas, kung diin maka-aghat kini og daghang turista nga mopalit sa lokal nga mga produkto gikan sa tourism sites nga ilang mabisitahan tungod ibalik kon i-refund kanila ang value added tax kon VAT sa ilang napalit kon molapas sa P3,000.
Si Amplayo nagkanayon nga hilabihang kalipay ni Cong. Suan samtang gipahibalo niini ang maayong balita, hilabina mas makadasig sa local producers sa indigenous products ug makahatag kalamboan dili lamang sa dakbayan sa Cagayan de Oro, apan lakip sa entero nasud partikularmente sa mga laaganan kon tourism destinations sa nasud.
