PIRMADO na ni Pres. Ferdinand ”Bongbong” Marcos Jr. kagahapon, adlaw nga Biyernes, ang balaudnon ni Cagayan de Oro 1st District Cong. Lordan Suan nga pabor sa mga magtutungha sa kolehiyo ug technical/vocational courses nga maghatag moratorium sa mga balayrunon sa pribado man o pampubliko nga tunghaan panahon sa kalamidad ug emerhensiya.
Si Bert Amplayo, ang tigpamaba sa Office of Cong. Lordan Suan, nagkanayon nga ang Republic Act no. 12077 kon, An Act Providing for a Moratorium on Student Loan Payments During Calamities, Disasters, Crisis Situations and Other Emergencies, magahatag sa taas nga lugway sa mga magtutungha sa pagbayad sa ilang balayrunon panahon nga magkalisod sila tungod sa kalamidad ug emerhensiya, ug dili kini mahimong babag arun dili makalampos sa ilang pagtungha.
Saysay ni Amplayo, kini nga balaud aplikado alang sa magtutungha sa State Universities and Colleges (SUCs), Local Universities and Colleges (LUCs), private Higher Education Institutions ( HEIs), ug private and public Technical-Vocational Institutions (TVIs), samtang gidili usab sa maong balaud ang pagpahamtang sa penalties o interes sa balayrunon alang sa mga magtutungha.
