GILUSAD sa Cagayan de Oro ang pinakaunang RISE- Artificial Intelligence (AI) & Drone Tech EXPO sa tibuok nasud adlaw’ng Lunes, Septiyembre 30 ning tuig.
Atol sa kalihokan, mihatag sa ilang tagsa-tagsa ka mensahe sila si City Administrator Atty. Roy Hilario Raagas kinsa mirepresentar ni Mayor Klarex Uy, City Education and Development Department – City Scholarships Office Departmnent Manager Richel Petalcurin-Dahay, ug City Councilor Suzette Magtajas-Daba kinsa Chairperson sa Committee on Education.
Anaa usab libreng AI and Drone playtime diin gihatagan og kahigayonan nga maka-operate sa drone ang mga ‘walk-in’ human sa hamubo nga mensahe gikan ni Thor Turrecha sa meldCx kalabot sa Learning Opportunities with Smart Technologies.
Ang EXPO naglangkob sa 10 ka booth nga gapakita sa makina nga gamiton sa AI, 4 x 4 truck diin magsilbing server, drone cage ug uban pa.
Kini nakadisplay karon nga adlaw lamang hangtud ala-9:00 sa gabii.
Anaa usab mga tools nga gamiton sa drone technology sama sa drone cage, drone simulation nga pwedeng mag-detect sa solution sa mga disaster, mag-detect ug uban pa.
Gi-offer usab sa kalihokan ang on-site application sa RISE-AI, usa ka fully-funded 3-month scholarship program nga nakatutok sa AI technology alang sa drone operations ug engineering diin gibutyag usab ni Dahay nga ang 1st 100 nga makakuha sa scholarship, sigurado nga naa’y maghulat nga trabaho kanila.
Ang RISE AI & Drone Tech EXPO gitanyag sa City Education and Development Department – City Scholarships Office uban sa meldCX kon usa ka technology company sa Cagayan de Oro bahin sa Artificial Intelligence ug drone technology ug Skunk Works.
Kini gisalmotan sa mga RISE-AI scholarship applicants, mga Senior High School students gikan sa nagkadaiyang tunghaan nga gakuha sa strand nga STEM kon Science, Technology, Engineering and Mathematics. Anaa usab ang 20th city council pinangulohan ni Vice Mayor Bebot Rodriguez, nagkadaiyang national government agencies, Cagayan de Oro Chamber of Commerce and Industry Foundation, Inc. (ORO CHAMBER) ug uban pa.
Tumong sa maong EXPO matud pa sa CEED-City Scholarships Office nga mapabati ang technology sa kabukiran ilabina nga mapaabot nga ang scholarships dili lamang sa 4 years apan pwede usab ang tulo ka bulan nga scholarship. Kini usab usa ka lakang sa tinguha nga mahimong ‘Education Inovation’ capital of the Philippines ang Cagayan de Oro. (NLB/CIO/photos by Roel Felicitas and Mark Francisco)
