DILI matukib ang kalipay ug dakong pasalamat ni Barangay Mambuaya Chairman Philip S. Porras kang City Mayor Rolando ‘Klarex’ Uy human pormal nang gitunol ang proyekto nga balor P4.8-million covered walkway sa Mambuaya Elementary School ug P1.5-million senior citizens building sa barangay Mambuaya, Pebrero 21, 2025.
Atol sa ribbon cutting & ceremonial turnover sa nasangpit nga proyekto, Biyernes, Pebrero 21, gidayeg ni Kapitan Porras si Mayor Klarex sa mga programa niini nga napahimuslan sa katawhan sa Mambuaya, ilabina sa mga tinun-an ug magtutudlo sa Mambuaya Elementary School ug mga senior citizens.
Sa iyang kabahin, nagpasalamat usab si Mayor Klarex sa City Engineer’s Office nga nakompleto na ang maong proyekto nga gipundohan ubos sa Barangay Empowerment Program, ingon man sa hugot nga suporta sa 20th City Council sa pagpangulo ni Vice Mayor Jocelyn ‘Bebot’ Rodriguez’ sa pagpaluyo sa mga programa sa syudad.
Nanghinaot usab ang mayor nga ampingan ang maong mga proyekto sanglit daghan pa ang makapahimulos niini. (AGP/Photos by Kim Zaldivar/CIO)
