ANDAM nang modawat og mga estudyante ang Cugman Integrated School sa sugod Academic Year 2025-2026.
Kini ang gibutyag ni Schools Division Superintendent Roy Angelo Gazo, sa Department of Education – Division of Cagayan de Oro atol sa inauguration sa maong tunghaan adlaw’ng Huwebes, Marso 20 ning tuig.
Sa mensahe ni SDS Gazo iyang gipahibalo nga modawat na ang maong tunghaan og mga estudyante gikan kindergarten, elementary ug high school ug gidasig niini ang mga ginikanan sa pagpahimulos sa edukasyon alang sa kabataan.
Una nang gimando ni Mayor Klarex Uy ang pagsiguro nga makutayan na sa kuryente ug tubig ang maong tunghaan aron magamit ug mapuslan kini sa mga estudyante ug mga magtutudlo nga nagtungha sa maong dapit.
Matud ni City Engr. Joel Momongan nga lakip sa gisulosyonan sa kagamhanang lokal ang electrical ug water installation ingon man ang pag-atiman sa mga suliran nga nakita sa maong tunghaan. (ACM/CIO)
