GILUGWAYAN pa ni Gov. Bambi Emano ang general community quarantine (GCQ) dinhi sa Misamis Oriental hangtud sa Mayo 15, 2020, o hangtud nga molurang na ang hulga sa coronavirus disease 2019 (COVID-19) sa tibuok Pilipinas. Kini, human gi-rekomendar sa mga mayores ug Provincial Task Force for COVID-19 ang GCQ extension aron masiguro nga walay mahitabong local transmission sa killer virus. Apan, dunay pipila ka isyu sa kwarentinas nga giusab. 
    Gawas nga mahimo nang maka-angkas sa motorsiklo ang miyembro sa pamilya ubos sa bag-ong Executive Order GYVBE No. 2020-216, lakip sa kasugoan ang protocol reporting nga sundon sa matag lungsod kalabot sa “probable,” “suspect,” o “positive” nga dili pwede i-report sa silingang lungsod.
    Susama pananglit dunay suspected COVID-19 infected resident sa El Salvador City, dili pwede ang Cagayan de Oro local government maoy mag-report o magpahibalo sa katawhan kalabot niini, susama sa nahitabo ning bag-o nga nagresulta sa kagubot ug kaguliyang sa Misamisnons.
    Nalakip kini sa bag-ong kasugoan human si Gov. Emano ug Task Force chief Dr. Jerie Calingasan mihangyo sa consultative meeting kauban ang 25 ka mayores sa tibuok lalawigan kalabot na kung angay paba i-extend ang general community quarantine dinhi sa Misamis Oriental.